أعلنت شركة OPPO عن هاتف Find N3 Flip الجديد بشكل رسمي، وهو هاتف قابل للطي يتم طيها في اتجاه واحد بطريقة الـFlip.
الهاتف الجديد بينافس في السوق مع الهواتف اللي بتتفتح زي الـGalaxy Z Flip 5، يعني هتقدر تستخدمه زي الهاتف العادي، أو تفتحه زي الموبايلات القديمة ودا يعتبر هو منافس قوي لجهاز سامسونج.
الموبايل نزل في الصين بس دلوقتي، ولما نزل في مصر هنقولكو بس انهردا احنا جايين نقدم مواصفات سريعة واهم العيوب والمميزات اللي بيقدمها التليفون ده وهل الموبايل يستحق الشراء ولا لأ.
مواصفات سريعة لموبايل Oppo Find N3 Flip
- الشاشة: علي شكل الثقب في منتصف الشاشة وتأتي من نوع Foldable LTPO AMOLED بمساحة 6.8 إنش بدقة الـ 1080×2520 بكسل
- المعالج: ميديا تيك Dimensity 9200 بتكنولوجيا 4 نانو ومعالج رسومي من نوع Immortalis-G715 MC11
- الذاكرة: نسختين للذاكرة الصلبة 256/512 جيجا بايت ونسخة واحدة من الذاكرة العشوائية 12 جيجا بايت.
- الكاميرا: الكاميرات الخلفية ثلاث كاميرات بدقة 50+32+48 ميجا بكسل، والكاميرا الامامية 32 ميجا بكسل.
- البطارية: 4300 مللي أمبير
- نظام التشغيل: اندرويد 13 بواجهة أوبو الأحدث الـ ColorOS 13.2
مميزات موبايل Oppo Find N3 Flip
- تصميم الموبايل شيك وعصري، وخامات الموبايل محترمة، ووزنه مناسب جدًا، ومفصلة الموبايل ممتازة، وبتفتح وتقفِل بطلاقة، ومتينة في نفس الوقت.
- الخامات المستخدمة في الهاتف تأتي من الزجاج مع إطار من الالمونيوم، وكمان الموبايل طارد لقطرات المياه الخفيفة بشهادة الـ IPX4.
- الموبايل بييجي بشاشة خارجية 3.2 بوصة، وهي شاشة صغيرة، بس ليها استخدامات كتير، زي انك تقدر تستخدمها للرد على المكالمات، أو الاطلاع على الإشعارات، أو انك تقدر تستخدمها زي ساعة ذكية كمان ممكن تتفرج منها علي اليوتيوب او تختار منه الموسيقي وحاجات زي كده.
- الموبايل كمان بييجي بشاشة داخلية كبيرة 6.8 بوصة، وبمعدل تحديث 120 هيرتز، وسطوع عالي يصل الي 900 شمعة مع طبقة حماية من نوع Corning Gorilla Glass Victus يعني هتقدر تستمتع بتجربة مشاهدة ممتازة.
- المعالج اللي جوه الموبايل قوي جداً، وهو معالج Dimensity 9200، يعني هتقدر تشغل أي لعبة أو برنامج بدون أي تأخير او أي مشاكل في الموبايل وقت استخدامة لفترات طويلة.
- كاميرات الموبايل مميزة، وهي ثلاثية، وبالتعاون مع Hasselblad، يعني هتقدر تصور صور واضحة ومميزة، حتى لو كنت بعيد عن الهدف، تدعم المثبت البصري الـ OIS والكاميرا الخاصة بالبورترية تقدم أداء ممتاز ويصل الزوم البصري الحقيقي مرتين علي الأقل.
- البطارية اللي جوه الموبايل بحجم 4300 مللي أمبير، وبتشحن بسرعة كبيرة، بقوة 67 واط، يعني هتقدر تشحن الموبايل بسرعة كبيرة، وهتقدر تستخدمه طول اليوم.
- الموبايل بييجي معاه جراب فخم من قطعتين، عشان يحافظ على الموبايل ويخليه شيك دا غير الشاحن اللي بيجي مع الموبايل في العلبة واللي بيوفر عليك كتير انك تشتري حاجة اصلية حتي لو غاليه.
عيوب موبايل Oppo Find N3 Flip
- بالرغم من الخامات اللي الموبايل بيستخدمها من الزجاج الا انه مبيدعمش الشحن اللاسلكي دا غير ان الشحن السريع في الموبايل مش اسرع حاجة أصلا.
- الموبايل زي ما قولنا مقاوم لطرطشة الماية بس ومش مقاوم للماية ودا لازم يخليك تحافظ علي الموبايل من المياه.
- الشاشات من حيث الاستخدام هي واحدة من افضل الشاشات ولكن تصميمها مش افضل حاجة بردو وكنا نطمح ان الشاشة تيجي بحواف اقل من اللي موجودة حاليا في الموبايل ده.
- الموبايل مبيدعمش منفذ سماعات الاذن العادية الـ 3.5 مم وعلشان تستخدم سماعات يا اما تكون سماعات بتستخدم منفذ الـ Type-c او سماعات بلوتوث ودا هيضيف تكلفة علي تمن الموبايل.
- عيب انا مش شايف انه عيب وهو ان الموبايل مبيدعمش تركيب كارت ذاكرة خارجي ومعتقدتش ان انت هتحتاجه لان ذاكرة الموبايل أصلا كبيرة.
سعر موبايل اوبو فايند ان 3
- السعر العالمي للموبايل حوالي 1000 دولار للنسخة 256 جيجا مع 12 جيجا بايت دا غير انه تم اطلاق نسخة عالمية من الهاتف.
- في الإمارات للنسخة 256 جيجا مع 12 جيجا رام بسعر 4000 درهم مع هدايا بقيمة تقريبا 2500 درهم.
تقييم العدة بشكل نهائي
الموبايل بيقدم تجربة أداء ممتاز ويكاد يكون مقارب جدا لموبايل سامسونج الـ Samsung Z Flip 5 واللي بيقدم تجربة قريبة جدا ومشابهة للموبايل، وبشكل عام، موبايل Oppo Find N3 Flip موبايل مميز جدًا، وبيقدم قيمة جيدة مقابل سعره. الموبايل فيه تصميم مميز، خامات ممتازة، أداء قوي، كاميرات مميزة، وشاشات ممتازة.
